04.04 2013

Fjársjóður í reynslusögum kvenna af erlendum uppruna

Verkefnið Heimsins konur á Íslandi miðar að því að gera framlag kvenna af erlendum uppruna til íslenskrar menningar og samfélagsins sýnilegt. Að verkefninu standa þær Kristín Rannveig Vilhjálmsdóttir, Ania Wozniczka, Kristín Viðarsdóttir og Letetia B. Jónsson í samvinnu við Söguhring kvenna, sem er samstarfsverkefni Borgarbókasafns Reykjavíkur og Samtaka kvenna af erlendum uppruna. Þær stöllur leita nú til almennings og vinnustaða um allt land eftir ábendingum um hugsanlega viðmælendur, 18 ára eða eldri. Hægt er að senda inn ábendingar fram til 26. apríl næstkomandi í gegnum heimasíðu Borgarbókasafns, http://www.borgarbokasafn.is, en á síðunni er sérstakur hnappur fyrir ábendingar. Áætlað er að bókin komi út vorið 2014 og stefna aðstandendur hennar að opnun vefsíðu og ljósmyndasýningar við það tilefni.

Verkefnið hefur hlotið stuðning frá Mannréttindaskrifstofu Reykjavíkur, Hlaðvarpanum og Reykjavík Bókmenntaborg UNESCO.

Styrkja fjölmenningu á Íslandi

Aðstandendur bókarinnar telja framlag þeirra fjölmörgu kvenna sem hafa af ýmsum ástæðum kosið að gera Ísland að heimili sínu vera ómetanlegt og að búseta þeirra á Íslandi auðgi íslenska menningu og samfélag, ásamt því að opna augu fólks fyrir ólíkum hugsunarhætti og menningu og skapa þannig nýja möguleika. Með því að gera framlag þessara kvenna sýnilegt og fagna því vilja þær styrkja fjölmenningu á Íslandi sem og sjálfsmynd kvenna af erlendum uppruna, enda hafi framlag þeirra ekki alltaf verið metið sem skyldi.

Hugmyndin að gerð bókarinnar vaknaði þegar Söguhringur kvenna var settur á stofn í Borgarbókasafninu fyrir fimm árum en markmið hans er að skapa vettvang fyrir konur til að deila menningarlegum bakgrunni sínum með öðrum. „Maður sá að það mættu á bókasafnið konur af ýmsum uppruna og það var svo mikill fjársjóður hérna í hvert einasta skipti sem maður fékk svona smá brot af lífsreynslu og sögu þeirra kvenna sem mættu. Svo maður var alltaf að spá í að skrá og hvernig það væri nú hægt. Líka til þess að fá aðra til að fá innsýn í líf þessara heimskvenna, eins og við köllum þær,“ segir Kristín Rannveig sem er verkefnastjóri fjölmenningar hjá Borgarbókasafni og umsjónarmaður Söguhringsins. Í fyrra bættist svo Letetia B. Jónsson í hóp aðstandenda bókarinnar og þá fóru hjólin að snúast.

Dætur tilnefna mæður sínar

„Okkur finnst fallegt að sjá að dætur séu að tilnefna mæður sínar og að nágrannar sendi inn tilnefningar. Það er einnig von okkar að einhverjar þeirra kvenna sem komu hingað fyrst verði tilnefndar af aðstandendum. Það er mikilvægt að líta á komur og framlag erlendra kvenna til Íslands í sögulegu ljósi,“ segir Ania.

Kristín Rannveig segir að þó mikilvægt sé að gera framlag kvenna af erlendum uppruna sýnilegt þá sé ekki síður mikilvægt skapa umræðu í samfélaginu og því mikilvægt að virkja samfélagið til að tilnefna. Það skapi líka athygli og fólk fari að tala saman um hugsanlega viðmælendur. Að sögn Aniu er alltaf hægt að gera framlag erlendra kvenna á Íslandi sýnilegra og hún vonar að útgáfa bókarinnar sé aðeins byrjunin. „Við fáum nú þegar góð viðbrögð, bæði frá Íslendingum og erlendu fólki hér,“ segir Ania og ítrekar mikilvægi þess að Íslendingar tilnefni konur til viðtals í bókina. „Frekar að tilnefna en ekki,“ sagði Kristín Rannveig að lokum í léttum dúr.

Dagný Hulda Erlendsdóttir
dagnyhulda@frettatiminn.is

http://www.frettatiminn.is/daegurmal/fjarsjodur_i_reynslusogum_kvenna_af_erlendum_uppruna/